بسم الله الرحمن الرحيم كان ياما كان في قديم الزمان ما يحلا الكلام الا بذكر النبي عليه الصلاة والسلام كان في هالثالث سلفات كل وحدة عندها ولد إلا وحدة فيهم لا بتحبل ولا بتجيب وبيوم من الايام مرق بياع التفاح تفاح للحبل تفاح للحبل تفاح للحبل تفاح للحبل راحت اشترت تفاحة اكلت نصها وحطت النص الثاني ع الشابك اجى جوزها اكل النص التاني

مرت الايام وحملت المرا وجابت ولد الو عين وحدة سمتو نص نصيص

كبر نص نصيص وصار يروح مع ولاد عمو على الصيد كانوا ولاد عمو اغنياء يروحوا ع الفرس اما نص نصيص كان يروح ع الغنمة و يصيد شو ما بدو يصيد غزال يصيد غنمة يصيد شو ما بدو

وبس يخلص الصيد يجو ولاد عمو يقتلو وياخدو الصيد منو ويروحو على دارهم يطبخو الصيد ويرموا العظم باب دار نص نصيص، ونص نصيص يقول لأهلو انو ولاد عمو بقتلو وباخذوا الصيد منو بس ما حدا مصدقو

قرر ابو نص نصيص يعرف مين الي بصيد ومين الي بياخذ الصيد راح وراهم وتخبى ورا شجرة وطلع عليهم من بيعد وشاف انو نص نصيص هو الي بصيد الصيد وولاد عمو بهجموا علي وباخذوا الصيد منو

قام ابو نص نصيص أخذ الصيد هو ونص نصيص روحوا ع دارهم وطبخو الصيد وأكلو وانبسطو، تاني يوم قرروا ولاد عمو يوخدوا نص نصيص ع بلد بعيدة حتى ابو نص نصيص ما يقدر يلحقهم ولا يشوفهم وهما بياخدوا الصيد من نص نصيص، حملو حالهم تاني يوم وراحوا على بلد بعيدة بعيدة طلعت بلد الغولة

ولما شافتهم الغولة من بعيد جايين على بلدها قامت قالتلهم: أهلا وسهلا في ولاد اخويا تعالوا عندي أغديكم واطبخلكم مفتول

قامت الغولة ذبحت هالديك وطبختلهم علي مفتول وتعشى نص نصيص و ولاد عمو ولما ليلت الدنيا قامت فرشتلهم يناموا

قام نص نصيص قال للغولة انا بنامش الا على فرشة ومعاي عرام فول قامت الغولة عملت لنص نصيص الي بدو اياه واستنتهم لناموا، وبس ناموا قامت بنص الليل وهي تقول: مظين ياسناني مظين تأكل نص نصيص وولاد عمو الاثنين، مظين ياسناني مظين تأكل نص نصيص وولاد عمو الاثنين

سمعها نص نصيص قام قرط حبة فول وقالها: انا جعان وبدي اوكل قامت الغولة راحت عملتلو جوز زغاليل وطبختلو اياهم وما طبخت وخلصت طبيخ الا الدنيا صارت الصبح ولما طلع الصبح راحت الغولة تسرح قام نص نصيص راح لولاد عمو و قالهم يا خربين البيت هاي الغولة وبدها توكلنا خلينا نهرب قبل ما تروح، نص نصيص ركب ع غنمتو وهرب ولما شافوا ولاد عمو غاروا منو قاموا ركبو ع خيّلهم وهربوا، لما رجعت الغولة ما لقتهم قامت عضت ع ايدها وقالت: آآآخ يلي فلتو مني من غير ما اكلهم

ولما وصل نص نصيص و ولاد عموعلى بلدهم قالوا لأهلهم انهم شردوا من الغولة الي كانت بدها توكلهم، قام نزل على بلد الغولة وهو يفكر كيف بدو يجيب الغولة، قام نص نصيص عملو حالو بياع حلو وعبى السلة حلو وصار ينادي ويقول: ياله حلو ياله حلو، قامت الغولة سمعت صوت بياع حلو طلعت تشتري قالتو: وقف اشتري منك حلو قالها لا انا ما ببيعك فوتي ع السلة وكلي قّد ما بدك قامت استغلت الفرصة وفاتت على السلة توكل حلو، قام سكرعليها السلة وقلها وقعتي وما حدا سمّى عليكي، قالتو آآآه انت نص نصيص وحبستني طلعني والك شو ما بدك، قاموا قتلو الغولة وخلصو منها وراحو رحلو على بلد الغولة وعاشوا هناك بخير وسلام وطار الطير ويمسيكم بالخير